يقول المولع اللي مايجور

يقول المولع اللي ما يجور ولا يداني الجـور
عسى اللّه ينتصف من ولعوا قلبي و خلونـي
أنا عن ماتريد النفس يا حظ النـدم مقهـور
إلى مني بغيت مواصلتهم حيـل مـن دونـي

ألا يا مجيب دعوة من دعاك بداجي الديجـور
أسالك يا إلهـي لا تطيـل فـراق مضنونـي
أنا اللي من تغاب الشمس لين إنه يشق النور
و أنا في حالـةٍ ياحيلـة اللّـه لا تلومونـي

على شقر الذوايب جض قلبي جضة المكسور
و لا ينلام قلبٍ باشقـر المجـدول مقرونـي
إلى مني ذكرت اللـي جبينـه كنّـه البنـور
تنقّض جرحي اللي مندرس و إنباح مكنونـي

أحسب إن الليالي يوم تضحك لي فرح وسرور
ولكن ما دريت إن شرهـا للنفـس مدفونـي
ألا يا عاذلين الروح روحي ما تطيع الشـور
و لا لي صالحٍ من شوركم تكفـون خلّونـي

أنا المفجوع أنا المبلي أنا المغرم أنا المجبور
أنا اللي من صخيف الوسط دايم تسهرعيوني
أنا بحبال من بيده شقاي و راحتـي ماسـور
ألا يا ويله من اللّه ربطنـي ربـط مجنونـي