يا هلي راح خمس ايام

ياهلي راح خمس ايام واربع ليال
واتصبر ودمع العين يهمل هميل
الغلا محرق ٍ قلبي على كل حال
من يخبرني عن هوى بالي ويكسب جميل

خبروا بي نظر عيني حسين الدلال
قولوا احرقت من يهوك ويش الدليل
في عيونك وصوف ٍ من عيون الغزال
وانت ولونك وجنسك يشهد الله مستحيل

جل من صورك واعطاك تاج الجمال
العزا عنك ياترف القدم مستحيل
ما ذكر بالجنوب وما ذكر بالشمال
ما مشى فوق الارض من البشر لك مثيل

كل ما جا لذكرك يا حبيبي مجال
صار همك على قلبي عريض ٍ طويل
الحلا و اللباقه والبهاء والكمال
والوفاء والمحبه والدواء للعليل