لا تمنن

لا تمنن بالمشاعر وانت مالك عندي منه
وش عطيت اكثر من اللي لك من الخافق عطيته
ما عطيت الا كلام وقلت لك مستغني عنه
كيف ارده لك وانا اصلا رفضت وما خذيته

انت يمكن صدق صادق بس صدقك ما كأنه
انت ياللي ما تشابه حرف واحد لي حكيته
مو مهم اللي تقوله قد وش بتسوي منه
مو مهم اللي تسوي قد هل فعلا نويته

كل خير جاك مني لا تظنه جاك لانه
يحتري ردك قسم بالله ما عمري احتريته
جعل عمرك ما ترده بس حس وقدر انه
جاك من طيبي وحتى الشكر منك ما رجيته

يا حسافه بس قلبي هذا تالي حسن ظنه
بعد كل اللي زرعته هذا كل اللي جنيته
ما هي منه ولا تدري ليه ماهي منه منه
عطني كل اللي خذيت وخذ ولا شي عطيته