حمامن يغني

حمامن يغني على راسي فني … شجاني و حني و انا في حسوفه
وهيض غرامي نواح الحمامي … جروحي جدامي بالفواد عوفة

و عيني هميلة شرات المخيلة … جرى الدمع منها سرعٍ هطوفه
لنظرات خلي انا مشتعلي … و شوفه يسلي وصده كلوفه

سباني وداده و الفؤاد زاده … وقلبي مراده يبا بيشوفه
حسين الدلالي فريد الجمالي … و لا له مثالي قليله وصوفه

جديله مدني وحيله يرن … ونقشٍ محني زهت به كفوفه
وعينه ثليله وخشمه سليله …. وخده شعيله بروقٍ زفوفه

وريقه مدامِ وينعش عظامي … شفا كل ظامي رحيقٍ يدوفه
وكشحٍ سليبي نعيم البيبي .. وخصرٍ جبيبي تعلت ردوفه

وعودٍ لياني شرى الخيزراني … حسين المعاني مليه طروفه
ولا ينصخابه لطيف الجنابه … وانا في طلابه احيد معروفه

ويرحم متيم به الحب تيم … وكنه يتيم رمت به ظروفه
رماني زماني بحب الغواني … وهو ما رحمني ولا فيه خوفه

يواعد ويخلف ولا عاد ينصف … وانا يوم يحلف قبلت محلوفه
اصدق مقاله وارضى بخياله … ولا ابغى بداله بعد قط توبه