الحمد للي بالسلامات عافاك

الحمد للي بالسلامات عافاك … الواحد المعبود رب الجلالي
يا سيدي لاباس عن كل ماجاك … اجهدت رجلك في دروب المعالي

ياللي سقيت الجود من فيض يمناك … والبست عود المجد بيض الفعالي
سلطان منهو الفخر ياشيخ لولاك .. وانت اللذي شرفت آول وتالي

ارض الوطن ياامير شفقا للقياك … والخير بقدومك غدى اليوم فالي
يادار جانا عيدنا وين حناك … وين الدخون ووين صفر الدلالي

هذا اللذي لاحل بالعز يزهاك … هذا اللذي قدره يروز الجبالي
الشوق ياسيد هل الطيب غناك … ومغطرفات الغيد لأجلك تلالي

كل ٍ له اسلوبه ولا ظن يخفاك … وانا صدى الإحساس هو راس مالي
قلب ٍ صدوق بداعي الحب هناك … فوق الغلا لو قلت بالحيل غالي

طاب القصيد بذكر صيتك وطرياك … وعطرت بأسمك يابو خالد مقالي
ياديرة الرحمن بالسعد بشراك … زانت علوم الوقت وارتاح بالي