وجودي

وجودي والعدم واحد على قلبك وفي بالك
وجودي عادي بعينك وهذا ما تبينته
ابارك لك اذا هذا قرارك يا هنيالك
ابارك لك على همي وهجر منك انا شفته

تبين ما توقعته بعادي صار يحلى لك
وخطواتك بدت تقصر ودرب الهجر شرعته
بدا واقعك يتغير طغى مرك على زلالك
طغت شمسك على ظلك قسى قلبك وطاعته

اذا هذي النهايه يا عسى فال السعد فالك
عسى الله يسعد ايامك على درب تخيرته
بواسي قلبي الشاقي بحبي كان يرضه لك
وبمسح دمعتي ويكون لي درس وتعلمته

لك السلوان يا قلبي تصبر خلك بحالك
ترا واجبك سويته وحبيته وقدرته
وفي ورايتك بيضا ولا تخليه في بالك
ولا تندم على ما فات وكل شى وله وقته