ودعتك الله

ماني مجازيك في صدك وهجرانك
ودعتك الله وتلقى واحد ثاني

اتعبت الاعيان والاقدام من شانك
وانت ولا وشي سويته علشاني

فزيت لك يوم قلت اسمك وعنوانك
لو كان ماتنتمي لاسمي وعنواني

ما جيت ادورك ولا اطق بيبانك
ولا اترجاك مثل فلان وفلاني

انت اللذي جيتني واعلنت بلسانك
بانك على شوفتي جايع وعطشاني

صدقت هرجك ولو ما اثبت برهانك
واقبلت لك مندفع من كل وجداني

ماكنت افكر يجي في يوم نسيانك
وانساك وانت معاهدني ما تنساني

الا بعد ماقريت الكذب باعيانك
حاولت اودعك وانسى كل ما كاني