انت الغلا

انت الغلا و الولع و الشّوق و الهمّه
و انت حبيبي و بلسم جرحي الدّامي
اذا سمعتك تجلّى خاطري همّه
و احس بالّراح ِ و ما القاك قدّامي
لي مر طاريك قمت بروح مهتمّه
من حر شوق ٍ يلح بخافق ٍ ظامي
يا در يا ياقوت من منبع غزر يمّه
ما برّزوا به اهل الاسواق ينسامي
فيك المحاسن بكل اوصاف ملتمّه
من هامه الرّاس لين اطراف الاقدامي
اخفي ودادك عن العذال و اضمّه
بين المعاطف عن عاذل و لوّامي
امشي على ارضاك طوع الامر و اتمّه
لا تزيدني جرح ٍ يكفي جرحي الدّامي
ابحرت بي في لجوج الغزر و اظلمّه
من دون وصلك ضفير الموج لطّامي
يا من تبلّى بحالي المولع و سمّه
اسبابه انته و زدت اشواقه هيامي
مطر المودّه و عهد الحب ف الذمّه
ما يرخصونه اهل العادات الاحشامي
انا ب همّه و طال الصّبر ما همّه
في مبهماته تغتّر كل علامي
يا كم احسن الظّن فيكم و ادع الشمّه
حاله قطيعه رجائي في دعي الشّامي