الحب معميني

الحب معميني و لا اشوف عيبه
لو كان حبه ساقني للبهاذيل
مقدر أميز خبث قلبه و طيبه
مثل الكرم يمحى عيوب الرجاجيل

الحب لى صابك يجيبك غصيبه
شيٍ حصل ما فيه قوه ولا حيل
مهما اكابر له بعيني و أريبه
يفسر اشواقي دموعٍ كما السيل

اكذب اذني في كلامٍ حكي به
و اناقش العاقل على الهرج لى قيل
واقعد افكر في امورٍ عجيبه
لى من غديت بوحدتي تالي الليل

مدري رفيقي و ين دربه يجيبه
في الخلف ولا راح في مقدم الخيل
دنيا بها العاشق يدور نصيبه
يا الله عساها تنتهي بالتساهيل