انتهت فرحة سنيني
يوم فارقني ضنيني
وأضرم النار بكنيني
واللهايب في خفوقي

خيّـب القاسي ظنوني
زاد بالقسوة غبوني
واغرق بدمعي عيوني
وانجرح بالدمع موقي

من دموع العين طاحت
ولجفاه ابـروق لاحت
سلوة الأيــام راحت
جفّ دمّـي في عروقي

داهم الأشجان بوحي
زادت بجوفي جروحي
ثم غدت بالبوح روحي
ناويه للضيم سوقي

اتبع الآهات صوتي
في المحبة فات فوتي
والله إن البعد موتي
به بدا حزني وعوقي

ويش أبي فيها حياتي
أنتظر ساعة مماتي
ليتني لحظة وفاتي
ألمحه بالعين فوقي

مخلص له في وعودي
خانني جاحد عهودي
وانكسر قلبي وعودي
ليه يسلبني حقوقي

فاقده نفسي هواها
همها الموجع طواها
ما لقت غيره دواها
آه من حبي وشوقي

ليت قلبي قد عصاني
يوم حاكاني وجاني
الحسايف في حناني
والوفا فيني وذوقي

يوم قلت إنه حبيبي
واعتبرته من نصيبي
غاب رغم إنه طبيبي
راح وين اعلاج توقي

أتبع الآهات صوتي
في المحبة فات فوتي
والله إن البعد موتي
به بدا حزني وعوقي

ويش أبي فيها حياتي
أنتظر ساعة مماتي
ليتني لحظة وفاتي
ألمحه بالعين فوقي